O sarda sentinella iskidatinke
Acrara a nou su grispu pizu ‘e mare,
De sos navìos k’ides abbovare
Sa pandhera ki ventulan distinghe.
Arga meda sunt battundhetinke
Dae paris k’as tzeladu ’e vardiare;
Nan: << mortu s’ortulanu a terra s’ortu>>
E oje ‘e canes e corvos ses portu.
Est duamiz’annos ki ses cascaradu
Pasandhe a sortos longos ken’ammentu,
E in domo tua akendhebi kimentu
Sunt sos ki su mare tink’at carradu.
S’aitu est abertu, su muru irfassadu
Non b’at bisonzu k’appan’ ardimentu,
Sos gurtuglios venin ke a dom’issoro
Videndheti ken’isprene nen coro.
S’ocru tontu, imbeladu, gherdiosu
Ke cane ‘e allesca sonniat jota ebìa
Non ti dolet s’anzena tirannìa
E unu kras prus de oje iscurosu.
Ovesu a sa miseria sonnicrosu
Picadu as: <<mai s’idat sa patria!
Crepet s’antica viera libertade
Paris a onore e sarda dignitade>>.
Ke sorde in muntunagliu reduìdu
Campandhe in mesu de sa puttina.
Ue, d’ajos tuos brussu vermu e iskina,
ue s’ocru vieru ‘e libertade amìdu?
Niedhu gurgu ti s’at ingullìdu;
ah, ite vida goi vile-miskina?
Menzus d-iat essere una morte digna
Ke d’umiliare-s goi sa Sardigna.
Nurazicas sentinellas mancadas
ti sunt Sardigna. Ue sos gherreris,
Sos leones fieros ki pesaias eris?
Sas aves ki ghettaian ispiettadas?
De bivos ocros, ue sas afframadas
Ki terrorizaian sos furisteris ?
In ue venas ke rios
trazadores,
In ue sos coros de cussos eroes?
Sentinella a locu tuo torra
Mira a su k’as in obbricu ‘e dovere,
S’antiku orgogliu ti vakat de mere
Su sacru onore t’inkende’ in pettorra(s)
Sas menzus armas mama tua t’apporra(t)
Ki ke una die la potas difendhère.
Vessinke voras dae s’infame tzella
Torra a s’impostu, sarda sentinella.
M. B.
patriotu sardu et arrebellu sotziali presoneri
