CHINI SEUS

Seus s’Unidadi de sa Giuventudi Indipendentista Sarda, s’organizadura giuvanili de su moimentu de liberadura natzionali e sotziali sardu. Po parri nostu, sa situatzioni de sutasvilupu crònicu de totus is setoris de s’economia nosta, de cussu industriali a cussu agropastorali fintzas a cussu artigianali, chi portat sa majoria manna de is giòvunus sardus a no tenni alternativas intras ‘e su disterru, sa precariedadi a vida o s’arruolamentu a is fortzas militaris e de politzia itallianas, no est donada sceti de su guvernu malu de custu o cuss’atru partidu o coalitzioni, ma sa cunditzioni struturali chi su stadu itallianu nc’imponit po podi sighiri a soddisfai is interessus colonialis cosa sua in Sardìnnia.

DE INNUI BENEUS

Nasceus cumenti 28 de Abrili in is primus mesis de su 2006, cun s’obietivu de diventai, a bellu a bellu, unu puntu de arreferimentu po totus cussus giòvunus cuscientis e prontus a gherrai contras a s’opressidura coloniali in sa Terra nosta e fai nasci cussa realidadi giuvanili organizada de su moimentu indipendentista sardu chi fia storicamenti mancada. Postus, in tres annus de lutas e de acrescimentu de su moimentu giuvanili de liberadura natzionali e sotziali, is presupostus polìticus et organizadivus chi srebiant, in su martzu de su 2009 su 28 de Abrili si sciollit in s’Unidadi de sa Giuventudi Indipendentista Sarda.

ITA OLLEUS

Olleus sa prena e totali emancipadura natzionali, sotziali, econòmica, polìtica, culturali e linguìstica de su Pòpulu Sardu e, duncas, su cumintzu de unu prucessu de autodeterminadura chi potzat portai a s’Indipendentzia stadali de sa Sardìnnia, solu mezu po dd’artziai de Natzioni negada e chentz’e stadu a Natzioni de Serie A, cun dinnidadi e deretus ugualis a cussus de totus is atras, chi siant unu sogetu ativu de paxi e ecuidadi in su Mediterràneu, in Europa et in su Mundu, connotu po sa solidaridadi e po sa giustìtzia sotziali, po s’uguagliàntzia bera intr’e is citadinus, po sa libertadi e po sa democratzia, chi ollit nai oberri spatzius de partecipadura colletiva a is prucessus de decisioni, po sa difesa de s’ambienti e de su territòriu e po sa valorizatzioni de is potenzialidadis mannas chi custu nci donat e po s’agiudai e su torrai a scoberri e lanciai sa lìngua, sa cultura e sa stòria nostas.


Unidadi de sa Giuventudi Indipendentista Sarda

www.giuventudi.org
giuventudi@giuventude.org
www.facebook.com/group.php?gid=73191871840

CHIE SEMUS

Semus s’Unidade de sa Giuventude Indipendentista Sarda, s’organizadura giuvanile de su moimentu de liberadura natzionale e sotziale sardu. Pro nosu, sa situatzione de sutasvilupu crònicu de totus sos setores de s’economia nostra, dae cussu industriale a cussu agropastorale fintzas a cussu artigianale, chi portat sa majoria manna de sos giòvunos sardos a no tennere alternativas intras ‘e su disterru, sa precariedade a vida o s’arruolamentu a sas fortzas militares e de politzia itallianas, 
no est donada feti dae su guvernu malu de custu o cuss’àteru partidu o coalitzione, ma sa cunditzione struturale chi s’istadu itallianu nos imponet pro podere sighire a soddisfare sos interessos coloniales suos in Sardìnnia.

DAE INNUE BENIMUS

Nascimus cumente 28 de Abrile in sos primos meses de su 2006, chin s’obietivu de diventare, a bellu a bellu, unu puntu de referimentu po totus cussos giòvunos cuscientes e prontos a gherrare contras a s’opressidura coloniale in sa Terra nostra e fàghere nàscere cussa realidade giuvanile organizada de su moimentu indipendentista sardu chi fia storicamente mancada. Postos, in tres annos de lutas e de acrescimentu de su moimentu giuvanile de liberadura natzionale e sotziale, sos presupostos polìticos et organizativos chi serbiant, in su martzu de su 2009 su 28 de Abrile si sciollet in s’Unidade de sa Giuventude Indipendentista Sarda.

ITE CHERIMUS

Cherimus sa prena e totale emancipadura natzionale, sotziale, econòmica, polìtica, curturale e limbìstica de su Pòpulu Sardu e, duncas, su cumintzu de unu prucessu de autodeterminadura chi potzat portare a s’Indipendentzia statali de sa Sardìnnia, solu mezu pro l’artziare dae Natzione negada e chentz’e istadu a Natzione de Serie A, chin dinnidade e deretos uguales a cussos de totus sas àteras, chi siant unu sogetu ativu de paghe e ecuidade in su Mediterràneu, in Europa et in su Mundu, connotu pro sa solidaridade e pro sa giustìtzia sotziale, pro s’uguagliàntzia bera intr’e sos citadinos, pro sa libertade e pro sa democratzia, chi cheret nàrrere abèrrere spatzios de partecipadura colletiva a sos prucessos de detzisione, pro sa difesa de s’ambiente e de su territòriu e pro sa valorizatzione de sas potenzialidades mannas chi custu nos donat e pro s’agiudare e su torrare a scoberrere e lanciare sa limba, curtura et istòria nostras.


Unidade de sa Giuventude Indipendentista Sarda

www.giuventude.org
giuventudi@giuventude.org
www.facebook.com/group.php?gid=73191871840